27 Sentyabr Azərbaycan xalqının yaddaşında şəhidlərimizin xatirəsi ilə bağlı olan xüsusi gündür. Bu tarix Vətən müharibəsinin başlanğıcını xatırlatmaqla yanaşı, Azərbaycanın ərazi bütövlüyü uğrunda canından keçən qəhrəmanlarımız qarşısında ehtiramımızın ifadəsidir.
Şəhidlər hər bir xalqın tarixində xüsusi yer tutur. Çünki onlar Vətən uğrunda ən böyük fədakarlığı göstərərək həyatlarını xalqın gələcəyinə həsr edirlər. Azərbaycan tarixində də şəhidlik zirvəsinə ucalan minlərlə qəhrəmanımız var.
2020-ci ildə baş verən Vətən müharibəsi zamanı Azərbaycan Ordusunun əsgər və zabitləri böyük qəhrəmanlıq göstərdilər. Müharibənin 44 gün davam etməsi və bu müddət ərzində yaşanan hadisələr xalqımızın yaddaşında silinməz iz buraxdı.
Hər bir şəhid ailəsinin özünəməxsus hekayəsi var. Bəzilərinin övladı, bəzilərinin həyat yoldaşı, bəzilərinin qardaşı Vətən uğrunda şəhid olub. Bu ailələrin yaşadığı ağrını sözlə ifadə etmək mümkün deyil. Lakin onların övladları ilə fəxr etməsi şəhidlərimizin necə böyük mənəvi dəyərə sahib olduğunu göstərir.
Şəhidlərimizin xatirəsini yaşatmaq yalnız dövlət qurumlarının və ictimai təşkilatların deyil, bütün cəmiyyətin məsuliyyətidir. Onların adlarını hörmətlə çəkmək, ailələrinə diqqət göstərmək, qəhrəmanlıq tarixlərini gənclərə anlatmaq hər bir vətəndaşın mənəvi borcudur.
27 Sentyabrda insanlar şəhidlərin məzarlarını ziyarət edir, onların ruhuna dualar oxuyur və ailələrinə baş çəkirlər. Bu ehtiram xalqımızın öz qəhrəmanlarını unutmadığının göstəricisidir.
Bu Anım Günündə bütün şəhidlərimizin qarşısında baş əyirik. Onların əziz xatirəsi Azərbaycan xalqının yaddaşında əbədi yaşayacaq. Allah şəhidlərimizə rəhmət eləsin, ailələrinə səbir versin!



Rahim Novruzov
Dağlıq Şirvan Regional Təhsil İdarəsinin müdir müavini