Qanlı 20 Yanvar faciəsindən 36 il ötür. 1990-cı ilin yanvarında baş verən hadisələr Azərbaycan xalqının tarixində təkcə qanlı bir səhifə deyil, eyni zamanda böyük bir həqiqətin üzə çıxdığı məqam kimi yadda qaldı. Sovet imperiyası özünün dağılmaqda olan siyasi sistemini qorumaq üçün Azərbaycan xalqına qarşı ağır hərbi güc tətbiq etdi.

Bakıya yeridilən qoşunlar heç bir xəbərdarlıq etmədən dinc əhalini hədəfə aldı. Küçələrdə hərəkət edən mülki avtomobillər, ictimai nəqliyyat, evinə tələsən insanlar atəşə tutuldu. Bu əməliyyatın məqsədi qorxu yaratmaq və milli azadlıq hərəkatını susdurmaq idi. Lakin nəticə gözlənilənin tam əksi oldu.

20 Yanvar hadisələri sübut etdi ki, zorakılıqla xalqın azadlıq iradəsini sındırmaq mümkün deyil. Azərbaycan cəmiyyəti bu faciədən sonra daha da birləşdi və müstəqillik ideyası ümummilli məqsədə çevrildi. Qanlı Yanvar imperiyanın mənəvi iflasını bütün çılpaqlığı ilə göstərdi.

Bu gün 20 Yanvar şəhidləri yalnız matəm simvolu deyil, milli dirənişin və ləyaqətin rəmzidir.


Ramin Abasov
Dağlıq Şirvan Regional Təhsil İdarəsinin müdiri