İranla artan gərginlik fonunda ABŞ-ın Yaxın Şərqdəki hərbi aktivliyi yeni mərhələyə qədəm qoyub.
"Reuters" agentliyinin peyk görüntülərinə istinadən yaydığı məlumatda bölgədəki strateji bazalarda ciddi yerdəyişmələr qeydə alınıb.
Məlumata görə, ABŞ ordusu Qətərdə yerləşən və bölgədəki ən böyük Amerika bazası sayılan Əl-Udeyd bazasında mobil buraxılış qurğularına raketlər yerləşdirib. Yanvar ayında həyata keçirilən bu addım, raket sistemlərinin daha sürətli manevr etməsinə və hər hansı təhlükəyə anında cavab verməsinə imkan yaradır.
Bundan başqa, fevral ayında hərbi hazırlıqların miqyası daha da genişlənib:
Əl-Udeyd (Qətər): Təyyarələrin sayında və hərəkətliliyində artım müşahidə olunub.
Müvəffəq Salti (İordaniya): Bu hava bazasında da hərbi təyyarələrin cəmləşməsi (yığılması) peyk kadrlarında əks olunub.
ABŞ Prezidenti Donald Tramp isə bu prosesləri dəstəkləyən bəyanatla çıxış edərək, Vaşinqtonun İrana qarşı çəkindirici gücü artırmaq məqsədilə bölgəyə ikinci bir aviadaşıyıcı qrup göndərə biləcəyini istisna etməyib.