Gəncə-Daşkəsən Regional Gənclər və İdman İdarəsinin Naftalan şəhəri üzrə gənclər və idman sektoru və Naftalan UGİM-in birgə təşkilatçılığı ilə Naftalanda qız cüdoçular arasında yoldaşlıq görüşü keçirilib. Azərbaycan Cüdo Federasiyasının və “Azercell Telekom” MMC-nin birgə əməkdaşlıqla başlatdığı “Qızlara ağ yaraşır” sosial kampaniyasına uyğun olaraq cüdoya cəlb olunan qızlar arasında təşkil edilən yoldaşlıq görüşündə Cüdo Federasiyasının əməkdaşları Əməkdar Məşqçiləri Musa İsmayılov və Ruslan Yunisov da iştirak edərək cüdoçu qızlara öz tövsiyyələrini veriblər.
Dostluq, yoldaşlıq əlaqələrinin gücləndirilməsi, cüdo idman növünə marağın artırılması və istedadlı idmançıların aşkar edilməsi məqsədilə təşkil edilən yoldaşlıq görüşündə Naftalan şəhəri, Goranboy və Tovuz rayonlarından ümumilikdə 30 nəfərdən çox qız cüdoçu iştirak edib. Sonda Naftalan UGİM tərəfindən cüdoçu qızlar həvəsləndirmə məqsədilə Fəxri fərmanlarla təltif olunublar.