2020-ci il sentyabr ayının 27-də Ermənistan silahlı qüvvələrinin təxribatına cavab olaraq Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə Müzəffər Azərbaycan ordusunun cəbhənin bütün istiqamətlərində başladığı əks-hücum əməliyyatı şanlı ordumuzun qələbəsi ilə başa çatdı. Azərbaycan ordusunun 44 günlük Vətən müharibəsində parlaq qələbəsi ilə 30 ilə yaxın müddət ərzində işğal altında olan torpaqlarımız azad olundu. Bu qələbə əsgər və zabitlərimizin rəşadəti nəticəsində qazanıldı. Bu gün Azərbaycan dövləti və xalqı Vətən müharibəsində şəhid olmuş əsgər və zabitlərimizin qəhrəmanlıqlarını yüksək qiymətləndirir və onların ailələrinə hərtərəfli qayğı və diqqət göstərirlər.
Azərbaycan Həmkarlar İttifaqları Konfederasiyası (AHİK) da şəhid ailələrinin sosial problemlərinin həllini həmişə diqqətdə saxlamaqdadır. AHİK 2016-cı il aprel və 2020-ci ilin iyul ayında Tovuz döyüşlərində həlak olmuş 23 şəhidin ailəsinin 41 azyaşlı övladını himayəyə götürüb. Həmin azyaşlıların hər birinə 18 yaşına çatanadək aylıq 150 manat vəsait verilir.
AHİK-in İcraiyyə Komitəsi Vətən müharibəsində şəhid olmuş daha 85 əsgər və zabitin ailələrinin himayəyə götürülməsi və hər bir ailəyə ayda 100 (yüz) manat vəsaitin ödənilməsi barədə qərar qəbul edib. Bununla da AHİK tərəfindən himayəyə götürülmüş şəhid ailələrinin sayı 108-ə çatıb.
Azərbaycan Həmkarlar İttifaqları Konfederasiyası bundan sonra da şəhid ailələrinin sosial problemlərinin yaxşılaşdırılması üçün müvafiq addımların davam etdirilməsini nəzərdə tutur.