Soyuq havalarda uzun müddət isti duş qəbul etmək dəridə quruluq, qabıqlanma və qaşınmaya səbəb ola bilər.

Bunu “Gazeta.Ru”ya açıqlamasında həkim-kosmetoloq Kristina Osepyan bildirib.

Onun sözlərinə görə, payızda hər gün duş qəbul etmək mümkündür, lakin suyun temperaturu çox isti olmamalıdır. Həkim uzun müddət isti suyun altında qalmağın dərinin qurumasını və qıcıqlanmasını artırdığını vurğulayıb.

Mütəxəssis duşun 5-10 dəqiqə ərzində ilıq su ilə qəbul edilməsini tövsiyə edib. O izah edib ki, dərinin səthində nəmi saxlayan qoruyucu təbəqə mövcuddur. İsti su, sabun və uzunmüddətli yuyunma dərinin təbii yağlarını aradan qaldıraraq bu baryeri zədələyir. Nəticədə dəridə dartılma hissi, qabıqlanma və qaşınma yaranır.

Həkimə görə, istilik mövsümünün başlaması da vəziyyəti ağırlaşdıra bilər. Belə ki, evlərdə havanın rütubəti azalır, küçədə isə soyuq və külək dərini daha da qurudur. Xüsusilə quru dəriyə və atopik dermatitə meyilli insanlarda yay aylarında istifadə edilən qulluq vasitələri bu dövrdə aqressiv təsir göstərə bilər.

Osepyan qeyd edib ki, gündəlik gigiyena öz-özlüyündə problem yaratmaya bilər. Burada insanın nə qədər tərləməsi, idmanla məşğul olub-olmaması və dərisinin yuyunmaya reaksiyası nəzərə alınmalıdır.

“Duşdan sonra mütəmadi olaraq qaşınma və dartılma yaranırsa, suyun temperaturunu azaltmaq, prosedurun müddətini qısaltmaq və istifadə olunan təmizləyici vasitəni dəyişmək lazımdır”, - deyə həkim vurğulayıb.

Mütəxəssis gündəlik qulluq üçün ətirsiz, yumşaq vasitələrdən istifadə etməyi, bütün bədəni bol sabunlamamağı tövsiyə edib. Duşdan sonra isə dərini dəsmalla yüngülcə qurulamaq və mütəmadi nəmləndirici krem çəkmək məsləhətdir.