27 Sentyabr Azərbaycan xalqının milli yaddaşında həm hüzn, həm də qürur hisslərini bir araya gətirən gündür.

Hüzn ona görə ki, Vətən müharibəsində Azərbaycanın igid oğulları öz həyatlarını itirdilər. Qürur ona görə ki, onların göstərdiyi fədakarlıq Azərbaycan tarixində silinməz iz buraxdı.

Azərbaycan Respublikasında sentyabrın 27-si rəsmi olaraq Anım Günü kimi qeyd olunur. Bu günün təsis edilməsi barədə Sərəncam 2 dekabr 2020-ci ildə imzalanıb.

27 sentyabr 2020-ci ildə başlayan Vətən müharibəsi 44 gün davam etdi. Azərbaycan xalqı həmin günlərdə həm döyüş meydanında, həm də arxa cəbhədə böyük birlik nümayiş etdirdi.

Müharibənin ən ağır tərəfi insan itkisidir. Hər bir şəhid bir ailənin övladı, bir valideynin ümidi, bir övladın atası və ya anası, bir dostun doğmasıdır.

Ona görə də şəhidlərin xatirəsinə ehtiram göstərmək yalnız dövlət səviyyəsində deyil, cəmiyyətin hər bir üzvünün mənəvi məsuliyyətidir.

Şəhidlərin adları küçələrə, məktəblərə, parklara verildikdə və onların həyat yolu haqqında kitablar, sənədli filmlər, məqalələr hazırlandıqda onların xatirəsinin gələcək nəsillərə ötürülməsinə xidmət edir.

Lakin ən böyük yaddaş insan qəlbində olan yaddaşdır.

27 Sentyabr münasibətilə keçirilən tədbirlərdə şəhidlərin xatirəsinin bir dəqiqəlik sükutla yad edilməsi, onların həyatından bəhs olunması və gənclərə Vətən müharibəsi haqqında məlumatların çatdırılması bu yaddaşın qorunmasının yollarındandır. 2026-cı ilin sentyabrında da müxtəlif elmi və mədəni müəssisələrdə Anım Gününə həsr olunmuş tədbirlər keçirilib.

Şəhid ailələri üçün isə 27 Sentyabr başqa bir məna daşıyır. Bu tarix onlara öz doğmalarını daha dərindən xatırladır. Cəmiyyətin onlara göstərdiyi hörmət və diqqət mənəvi baxımdan böyük əhəmiyyət daşıyır.

Bu gün biz yalnız keçmişi xatırlamamalı, gələcək nəsillərə də mühüm bir dəyər ötürməliyik: Vətənə sevgi, dövlətə məsuliyyət, tarixə hörmət və insan həyatının qiyməti.

Şəhidlərin xatirəsini yaşatmaq onların adlarını unutmadığımızı göstərməklə yanaşı, gələcək nəsillərin tariximizi düzgün bilməsinə də imkan yaradır.

27 Sentyabr bizim üçün yaddaş günüdür. Bu yaddaşın yaşadılması isə hər birimizin üzərinə düşən mənəvi vəzifələrdəndir.

Şəhidlərimizin əziz xatirəsini dərin ehtiramla yad edir, onların ruhu qarşısında baş əyirik.

27 Sentyabr – Anım Günü münasibətilə bütün şəhid ailələrinə dərin hörmətimizi bildirir, Vətən uğrunda canından keçən qəhrəmanlarımızı daim minnətdarlıqla xatırlayacağımızı ifadə edirik.

Vidadi Rəhimov
"İsmayıĺlı rayon Mərkəzi Xəstəxanası" Publik Hüquqi Şəxsin direktoru