26 İyun Azərbaycan xalqının qürurla qeyd etdiyi ən əlamətdar günlərdən biridir. Bu tarix Azərbaycan Respublikasının Silahlı Qüvvələri Günü kimi ölkəmizin hər bir vətəndaşı üçün xüsusi əhəmiyyət daşıyır. Vətənin keşiyində dayanan, dövlətimizin müstəqilliyini, suverenliyini və ərazi bütövlüyünü qoruyan qəhrəman hərbçilərimizə dərin hörmət və ehtiram məhz bu gündə daha aydın ifadə olunur.
Azərbaycan Ordusu dövlətimizin ən mühüm dayaqlarından biridir. Ulu Öndər Heydər Əliyev tərəfindən əsası qoyulan güclü ordu quruculuğu siyasəti bu gün də uğurla davam etdirilir. Son illərdə həyata keçirilən genişmiqyaslı islahatlar nəticəsində ordumuz öz döyüş qabiliyyətini daha da artıraraq dünyanın nüfuzlu hərbi qüvvələri sırasında layiqli yer tutmuşdur.
Azərbaycan əsgərinin qəhrəmanlığı və vətənpərvərliyi xüsusilə 2020-ci ildəki Vətən müharibəsi zamanı bütün dünyaya nümayiş etdirildi. Müzəffər Ali Baş Komandan İlham Əliyev rəhbərliyi altında ordumuz tarixi Zəfər qazanaraq torpaqlarımızı işğaldan azad etdi. Bu Qələbə Azərbaycan xalqının birlik və həmrəyliyinin, əsgər və zabitlərimizin isə misilsiz qəhrəmanlığının nəticəsi idi.
Bu gün Azərbaycan Ordusu yalnız ölkəmizin təhlükəsizliyinin qarantı deyil, həm də xalqımızın qürur mənbəyidir. Şəhidlərimizin əziz xatirəsi daim qəlbimizdə yaşayır, qazilərimizin və veteranlarımızın xidmətləri hər zaman yüksək qiymətləndirilir.
26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı, qazilərimizi və şəhid ailələrini səmimi qəlbdən təbrik edir, onlara möhkəm cansağlığı, firavan həyat və yeni uğurlar arzulayırıq.
Qəhrəman Azərbaycan əsgərinə eşq olsun! Yaşasın qüdrətli Azərbaycan Ordusu!
Səxavət Məmmədov,
İş adamı