Hər il 26 iyun tarixində Azərbaycan xalqı böyük qürur və fəxarət hissi ilə Silahlı Qüvvələr Gününü qeyd edir. Bu əlamətdar gün Azərbaycan dövlətçiliyinin, müstəqilliyinin və ərazi bütövlüyünün keşiyində ayıq-sayıq dayanan qəhrəman hərbçilərimizə göstərilən dərin ehtiramın ifadəsidir.
Azərbaycan Respublikasının Silahlı Qüvvələrinin yaradılması tarixi 1918-ci il iyunun 26-na təsadüf edir. Həmin gün Azərbaycan Xalq Cümhuriyyətinin qərarı ilə ilk nizami hərbi hissə – Əlahiddə Azərbaycan Korpusu yaradılmış və bununla da milli ordumuzun təməli qoyulmuşdur. Sonralar Ulu Öndər Heydər Əliyevin 1998-ci il 22 may tarixli Fərmanı ilə 26 iyun rəsmi olaraq Silahlı Qüvvələr Günü elan edilmişdir.
Müstəqilliyini bərpa etdikdən sonra Azərbaycan Ordusunun gücləndirilməsi dövlət siyasətinin əsas istiqamətlərindən biri olmuşdur. Ulu Öndər Heydər Əliyevin rəhbərliyi ilə ordu quruculuğunda mühüm islahatlar həyata keçirilmiş, peşəkar hərbi sistem formalaşdırılmış, ordumuzun döyüş qabiliyyəti əhəmiyyətli dərəcədə artırılmışdır. Bu siyasət bu gün də uğurla davam etdirilir.
Azərbaycan Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi ilə ordumuz dünyanın ən güclü orduları sırasında öz layiqli yerini tutmuşdur. Müasir silah və texnika ilə təchiz olunan, yüksək hazırlığa malik Azərbaycan Ordusu regionun ən qüdrətli hərbi qüvvələrindən birinə çevrilmişdir.
2020-ci ildə baş vermiş 44 günlük Vətən müharibəsi Azərbaycan Ordusunun gücünü, peşəkarlığını və xalqla birliyini bütün dünyaya nümayiş etdirdi. Şanlı Zəfərlə nəticələnən bu müharibədə qəhrəman əsgər və zabitlərimiz böyük şücaət göstərərək torpaqlarımızı işğaldan azad etdilər və xalqımıza uzun illər gözlənilən Qələbə sevincini yaşatdılar. 2023-cü ildə həyata keçirilən lokal antiterror tədbirləri nəticəsində isə ölkəmizin bütün ərazisində dövlət suverenliyi tam bərpa olundu.
Bu gün Azərbaycan əsgəri cəsarətin, vətənpərvərliyin, sədaqətin və fədakarlığın simvoludur. Şəhidlərimizin əziz xatirəsi daim qəlbimizdə yaşayır, qazilərimizin qəhrəmanlığı isə hər bir azərbaycanlı üçün qürur mənbəyidir.
26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı, qazilərimizi və şəhid ailələrini ürəkdən təbrik edir, Azərbaycan Ordusunun hər zaman qüdrətli, yenilməz və qalib olmasını arzulayırıq.
Yaşasın müstəqil Azərbaycan! Yaşasın qalib Azərbaycan Ordusu!
Hatəm İbrahimov,
Xeyriyyəçi- İş adamı