12 dekabr – Ümummilli Lider Heydər Əliyevin anım günü Azərbaycan xalqı üçün həm hüzn, həm də qürur dolu bir gündür. Bu gün biz yalnız bir siyasi xadimi deyil, ölkənin dövlətçilik tarixini yenidən yazan dahi bir rəhbəri yad edirik. Heydər Əliyevin fəaliyyəti Azərbaycan üçün milli iradənin, müdrikliyin və əzmin təntənəsi kimi qiymətləndirilir.

Ulu Öndərin dövlətçilik fəlsəfəsi milli maraqlara sadiqlik, uzaqgörənlik və xalqın rifahını ən yüksək dəyər kimi müəyyənləşdirmişdir. 1969-cu ildə respublikaya rəhbərliyə gəldikdən sonra o, Azərbaycanın iqtisadi və sosial dirçəliş dövrünü başlatdı. İri sənaye müəssisələri tikildi, infrastruktur yeniləndi, milli kadr siyasəti gücləndirildi.

Lakin onun ən böyük xidməti müstəqil Azərbaycan dövlətinin qorunması və möhkəmləndirilməsi oldu. 1990-cı illərin əvvəllərində ölkəni bürüyən siyasi qeyri-sabitlik, separatçılıq, iqtisadi çöküş fonunda Azərbaycan məhv olmaq təhlükəsi ilə üz-üzə qalmışdı.
Bu çətin dövrdə xalqın çağırışı ilə ölkənin idarəçiliyini üzərinə götürən Heydər Əliyev dövlətçiliyi xilas etdi və müstəqilliyi fakt deyil, reallıq halına çevirdi.

Onun rəhbərliyi ilə həyata keçirilən genişmiqyaslı islahatlar nəticəsində Azərbaycan siyasi sabitlik qazandı, iqtisadi inkişaf başladı. 1994-cü ildə imzalanmış “Əsrin müqaviləsi” ölkənin enerji siyasətində dönüş nöqtəsi oldu və Azərbaycan beynəlxalq iqtisadi sistemin etibarlı tərəfdaşına çevrildi.

Bu gün Azərbaycanın əldə etdiyi bütün uğurlar – güclü ordu, sabit iqtisadiyyat, yüksələn beynəlxalq nüfuz, qlobal layihələrlə bağlı liderlik – Heydər Əliyevin uzaqgörənliklə formalaşdırdığı siyasətin bəhrəsidir.

12 dekabr xalqımızın Ulu Öndərə olan ehtiramının, onun irsinə sədaqətinin rəmzidir.


Nəzər Mahmudov
Azərişıq ASC nin Şimal Qərb RETSİ nin İsmayıllı EŞ-nin rəisi