Bu gün – 12 dekabr, Azərbaycan xalqının taleyinə yön verən bir insanın, millətin güvənc yeri olan bir liderin – Heydər Əliyevin anım günüdür. Bu gün biz onun xatirəsini yalnız ehtiramla deyil, həm də sonsuz minnətdarlıq hissi ilə yad edirik.

Heydər Əliyev həyatı boyunca xalqının yükünü çiynində daşıyan, millətin taleyinə sahib çıxan böyük şəxsiyyət idi. O, çətinliklərdən heç vaxt çəkinməyən, ən ağır məqamlarda belə ölkəsinin gələcəyinə inanmağı bacaran lider oldu.
Onun müdrikliyi, qətiyyəti və siyasi iradəsi Azərbaycanı ən çətin fırtınalardan çıxardı. 1993-cü ildə ölkənin dağılmaq təhlükəsinə yaxın olduğu bir vaxtda xalqın ona üz tutması təsadüf deyildi — bu, ümidsizliyin içində doğan son ümid idi.

Və o ümid özünü doğrultdu. Heydər Əliyev ölkəni xaosdan qurtardı, sabitlik yaratdı, müstəqil dövlətin sütunlarını möhkəmləndirdi. Onun həyata keçirdiyi siyasət, imzaladığı tarixi qərarlar, qurduğu dövlətçilik modeli bu gün də Azərbaycanın inkişaf yolunu müəyyən edir.

Ulu Öndər təkcə siyasi lider deyil, həm də xalqını sevən, ona güvənən, xalq üçün yaşayan bir insan idi. O, Azərbaycanı yalnız bu gün üçün deyil, gələcək nəsillər üçün qururdu.

Bu gün Azərbaycanın güclü ordusu, möhkəm iqtisadiyyatı, dünya siyasətində söz sahibi olan mövqeyi Heydər Əliyevin müdrikliyinin nəticəsidir.
12 dekabr – bir millətin öz liderinə olan sevgisinin, sədaqətinin və minnətdarlığının ən kədərli, eyni zamanda ən uca təzahürüdür.


Aydın Rəhimov,
Abşeron-Xızı Regional Təhsil İdarəsinin rəis müavini