Bir xalqın müstəqilliyi onun yalnız siyasi və iqtisadi azadlığını deyil, həm də milli kimliyini qorumaq və inkişaf etdirmək imkanını ifadə edir. Ana dili, ədəbiyyatı, musiqisi, incəsənəti, adət-ənənələri və tarixi yaddaşı hər bir xalqın mənəvi sərvətidir. Azərbaycan xalqı üçün 18 Oktyabr – Müstəqilliyin Bərpası Günü bu dəyərlərə sahib çıxmağın və onları gələcək nəsillərə ötürməyin əhəmiyyətini bir daha ön plana çıxarır.
1991-ci il oktyabrın 18-də Azərbaycanın dövlət müstəqilliyinin bərpasını rəsmiləşdirən Konstitusiya Aktının qəbul edilməsi xalqımızın öz milli taleyini müəyyənləşdirmək yolunda mühüm addım oldu. Müstəqillik Azərbaycan xalqına dövlətçilik ənənələrini inkişaf etdirmək, milli-mədəni irsini qorumaq və özünü dünyaya müstəqil xalq kimi təqdim etmək imkanlarını genişləndirdi.
Azərbaycanın zəngin mədəniyyəti əsrlər boyu formalaşıb. Xalq musiqimiz, muğam sənətimiz, xalçaçılıq ənənələrimiz, memarlıq abidələrimiz, klassik ədəbiyyatımız və xalq yaradıcılığımız milli kimliyimizin əsas sütunlarıdır. Bu irsin qorunması yalnız mədəniyyət müəssisələrinin deyil, bütün cəmiyyətin ortaq vəzifəsidir.
Müstəqillik dövründə milli-mənəvi dəyərlərin təbliği, tarixi abidələrin qorunması, mədəniyyətin beynəlxalq səviyyədə tanıdılması və Azərbaycan dilinin inkişafı istiqamətində mühüm işlər görülüb. Bu fəaliyyətlərin davamlı olması üçün hər bir ailədə, təhsil müəssisəsində və ictimai mühitdə milli dəyərlərə hörmət aşılanmalıdır.
Qloballaşma şəraitində xalqlar müxtəlif mədəniyyətlərlə daha sıx təmasda olurlar. Bu proses yeni biliklərin əldə olunması və dünyagörüşünün genişlənməsi baxımından faydalıdır. Lakin müasirliyə doğru addımlayarkən milli kimliyimizi unutmaq, ana dilimizə laqeyd yanaşmaq və tarixi yaddaşımızı zəiflətmək olmaz. Əksinə, milli köklərini tanıyan insan dünyaya daha inamla açılır.
Xüsusilə gənc nəslin Azərbaycan tarixini, ədəbiyyatını və mədəniyyətini öyrənməsi mühüm əhəmiyyət daşıyır. Kitab oxumaq, milli musiqiyə maraq göstərmək, tarixi məkanları ziyarət etmək və ana dilində düzgün danışmaq milli-mənəvi irsin yaşadılmasına xidmət edən sadə, lakin vacib addımlardır.
Müstəqillik həm də xalqın öz mədəni inkişaf yolunu müəyyənləşdirmək hüququdur. Azərbaycan öz milli dəyərlərini qorumaqla yanaşı, dünya mədəniyyətinə töhfə vermək imkanına malikdir. Bu baxımdan, mədəni irsimizin təbliği ölkəmizin beynəlxalq nüfuzunun artmasına da xidmət edir.
18 Oktyabr milli kimliyimizə, tariximizə və mənəvi sərvətlərimizə daha dərindən nəzər salmaq üçün gözəl fürsətdir. Müstəqilliyimizin gücü yalnız dövlət sərhədlərimizin qorunmasında deyil, xalqımızın öz dilinə, tarixinə və dəyərlərinə bağlılığında da təcəssüm olunur.
Müstəqilliyin Bərpası Günü münasibətilə bütün soydaşlarımızı təbrik edirik! Qoy ana dilimiz daim yaşasın, milli-mənəvi dəyərlərimiz qorunsun, mədəniyyətimiz dünyada tanınsın. Azərbaycan xalqı öz tarixi ilə fəxr etsin, gələcəyə inamla addımlasın. Müstəqilliyimiz və milli birliyimiz əbədi olsun!
Mahmud Süleymanov,
İsmayıllı rayon İcra Hakimiyyəti Başçısının 1- ci müavini