Ölkələr arasında ittifaqı qorumaq istəyinə görə Rusiya indiki Ermənistan hakimiyyəti ilə münaqişədə deyil.

Bunu Lenta.ru ilə söhbətində tarix elmləri namizədi, Rusiya Xarici İşlər Nazirliyinin MDBMİ Beynəlxalq Araşdırmalar İnstitutunun aparıcı elmi işçisi Nikolay Silayev deyib.

"Rusiyanın kursu təqribən belədir: biz Ermənistanla ittifaqı saxlamaq istəyirik və bunun üçün səy göstərəcəyik. Bu o deməkdir ki, biz Ermənistanın hazırkı hakimiyyəti ilə mübahisə etmirik, kəskin ictimai qarşıdurmaya getmirik", - politoloq vurğulayıb.

Silayev Rusiya ilə Ermənistan arasında ikitərəfli münasibətlərdə mümkün dəyişiklikləri dəyərləndirib və Rusiya rəhbərliyinin qəti mövqeyini qeyd edib. Onun fikrincə, Moskvanın artıq İrəvandan böyük gözləntiləri yoxdur, ona görə də Ermənistanın baş naziri Nikol Paşinyanın hərəkətləri Kremldə məyusluğa səbəb olmayacaq.

Politoloq Rusiyanın Ermənistanda və digər postsovet ölkələrində siyasi və media fəaliyyətini gücləndirəcəyini də bildirib. Eyni zamanda, Silayev qeyd edib ki, Moskvanın regionda siyasətinin əsasları qorunub saxlanılacaq.