Almaniyanın Halle şəhərində yerləşən kurort kompleksinin rəhbərliyi alman dilini kifayət qədər bilməyən şəxslərin yerli çimərliyə girişini məhdudlaşdırıb.

Bu barədə DPA agentliyi məlumat yayıb.

İstirahət mərkəzinin meneceri Mattias Nobel bildirib ki, müəssisənin əməkdaşları ziyarətçilərin təhlükəsizliyini təmin etməyə və su hövzəsində qaydalara riayət olunmasına nəzarət etməyə borcludurlar. Onun sözlərinə görə, əgər ziyarətçi ilə ünsiyyətdə dil baryeri yaranarsa, həmin şəxsin əraziyə girişinə icazə verilməyə bilər.

Məlumata görə, bu qərarın qəbul edilməsinə yaxın zamanda baş vermiş hadisə səbəb olub. Belə ki, kompleksin direktoru xilasedici kimi müdaxilə edərək bir uşağı suyun dərin hissəsindən çıxarmalı olub.

Yeni qayda qüvvəyə mindikdən sonra artıq bir neçə nəfərin çimərliyə girişinə icazə verilmədiyi bildirilir.

Ünvanına yönələn tənqidlərə baxmayaraq, kurort rəhbərliyi qəbul etdiyi qərarı yenidən nəzərdən keçirməyi planlaşdırmır.