Ermənistanın Baş naziri Nikol Paşinyan "Tramp marşrutu"nun təhlükəsizliyini təmin etmək üçün hələlik ABŞ-ın özəl hərbi şirkətinin (ÖHŞ) yerləşdirilməsinə razılıq verməyəcək.
Bu barədə Lenta.ru-ya müsahibəsində MGİMO-nun Beynəlxalq Araşdırmalar İnstitutunun İntellektual Məlumat Təhlili Laboratoriyasının direktoru Nikolay Silayev bildirib.
"Düşünmürəm ki, söhbət tammiqyaslı özəl hərbi şirkətdən gedəcək. Bu, Nikol Paşinyan üçün çox riskli bir addımdır", - deyə o qeyd edib.
Politoloq əlavə edib ki, oxşar ssenarini tamamilə istisna etmək olmaz:
"Lakin daha vacib məqam odur ki, "Tramp marşrutu" layihəsi Rusiyanın Zaqafqaziyadakı nəqliyyat layihələrindən kənarlaşdırılmasını nəzərdə tutur. Əvvəllər bu nəqliyyat dəhlizinin Azərbaycanın əsas hissəsindən Ermənistan ərazisi vasitəsilə Naxçıvana keçəcəyi ehtimal olunurdu".
Silayev həmçinin ABŞ-ın vitse-prezidenti Cey Di Vensin İrəvana səfərinin yekunlarından danışıb. Onun sözlərinə görə, məlumat mərkəzi (data-center) üçün Ermənistana "NVIDIA Blackwell" prosessorlarının tədarükü xüsusi maraq kəsb edir, lakin ölkədə bu sahənin inkişafı üçün müəyyən məhdudiyyətlər mövcuddur.