Erməni keşiş Baqrat Qalstyanın rəhbərlik etdiyi "Tavuş hərəkatı"nın mitinqi fonunda Ermənistanın üçüncü prezidenti Serj Sarkisyan ölkəni tərk edib.

Publika.az xəbər verir ki, bu barədə "Hraparak" nəşri yazıb.

Nəşrin nənbələrinin bildirdiyinə görə, o, Almaniyada illik profilaktik tibbi müayinədən keçməyə qərar verib və bu, çoxdan planlaşdırılıb.

"Bəlkə də Sarkisyanın səfəri Tavuşda başlayan hərəkatın arxasında onun izini görməmək və Baqratın başçılığı ilə başlayan hərəkatı əvvəlkilərlə bağlamamaq üçün xüsusi olaraq təxirə salınmayıb. Baxmayaraq ki, o, kənarda dayanıb və müxalifət arasında gedən müzakirələrdə fəal iştirak edə bilmir. Lakin mənbələrimiz bizi əmin etdilər ki, Sarkisyan bir neçə günlüyünə gedib və həftəsonu qayıdacaq", - nəşr yazıb.

Qeyd edək ki, erməni keşiş Baqrat Qalstyanın rəhbərlik etdiyi “Tavuş hərəkatı” bu gün İrəvana çatıb və Respublika meydanında mitinq təyin edilib.

Ermənistanın baş naziri Nikol Paşinyan mayın 7-də keçirdiyi mətbuat konfransında “Tavuş hərəkatı”nın keçmiş prezident, “Ermənistan” fraksiyasının lideri Robert Koçaryan tərəfindən idarə edildiyini bildirib. O, istənilən qanunsuz hərəkətə qarşı sərt addımlar atılacağını açıqlayıb.