Təhsil cəmiyyətin gələcəyini müəyyənləşdirən əsas sahələrdən biridir. Güclü təhsil sistemi isə peşəkar və məsuliyyətli müəllimlər olmadan mümkün deyil. 5 Oktyabr – Beynəlxalq Müəllimlər Günü bu baxımdan müəllim əməyinin əhəmiyyətini bir daha ön plana çıxarır.
Məktəb uşaqların yalnız bilik aldığı yer deyil. Burada onlar sosial münasibətləri öyrənir, dostluq edir, əməkdaşlıq bacarıqları qazanır və cəmiyyətin bir üzvü kimi formalaşırlar. Bu prosesin mərkəzində isə müəllim dayanır.
Müəllim hər bir şagirdin potensialını üzə çıxarmağa çalışır. Biri riyaziyyata, digəri ədəbiyyata, başqa biri xarici dillərə, idmana və ya incəsənətə daha çox maraq göstərə bilər. Müəllimin əsas vəzifələrindən biri həmin maraqları düzgün istiqamətləndirmək və uşağın öz qabiliyyətlərinə inanmasına şərait yaratmaqdır.
Müəllim əməyinin nəticəsi yalnız qiymətlərlə ölçülə bilməz. Əla qiymət alan şagirdlə yanaşı, özünəinamını qazanan, məsuliyyətli davranmağı öyrənən, başqalarına hörmət edən və müstəqil düşünə bilən şagird də müəllimin uğurudur.
Bu gün təhsil qarşısında əsas məsələlərdən biri də uşaqlarda müstəqil düşüncə formalaşdırmaqdır. Müasir dünyada informasiya çoxdur. Əsas məsələ isə həmin informasiyadan düzgün istifadə etmək, onu təhlil etmək və doğru nəticə çıxarmaqdır.
Bu baxımdan müəllimin işi daha da məsuliyyətli xarakter alır. Müəllim şagirdə hazır cavab verməklə yanaşı, düzgün sual verməyi də öyrətməlidir.
Valideynlərin müəllimlərlə əməkdaşlığı da uşaqların təhsilində mühüm rol oynayır. Məktəb və ailə arasında sağlam münasibətlər qurulduqda şagirdin inkişafı üçün daha əlverişli şərait yaranır.
Müəllimə hörmət, onun əməyinə qiymət vermək və təhsilə diqqət göstərmək əslində gələcəyə sərmayə qoymaqdır. Çünki bu gün yetişən şagirdlər sabah ölkənin müxtəlif sahələrində fəaliyyət göstərəcəklər.
Təbrik edirik!
5 Oktyabr – Beynəlxalq Müəllimlər Günü münasibətilə bütün müəllimlərimizi ürəkdən təbrik edirik. Sizə möhkəm cansağlığı, ailə səadəti, fəaliyyətinizdə uğurlar və daim yüksək nəticələr arzulayırıq. Siniflərinizdən çıxan hər bir uğurlu insan sizin əməyinizin gözəl nəticəsi olsun. Bayramınız mübarək!
Səxavət Səlimov
“Azərenerji” ASC-nin Avtonəqliyyat İdarəsinin rəisi