28 May Azərbaycan xalqının tarixində ən şərəfli və unudulmaz günlərdən biridir. 1918-ci ilin məhz bu günündə Şərqdə ilk demokratik respublika olan Azərbaycan Xalq Cümhuriyyətinin yaradılması elan edildi. Bu hadisə yalnız Azərbaycanın deyil, bütün müsəlman Şərqinin siyasi tarixində mühüm dönüş nöqtəsi oldu. Azərbaycan xalqı əsrlər boyu arzuladığı müstəqilliyə qovuşdu və öz dövlətini qurmaq iradəsini bütün dünyaya nümayiş etdirdi.
Azərbaycan Xalq Cümhuriyyəti qısa müddət fəaliyyət göstərməsinə baxmayaraq, dövlətçilik tariximizdə silinməz iz qoydu. Həmin dövrdə dövlət bayrağı, milli ordu, parlament və digər dövlət institutları yaradıldı. İnsan hüquq və azadlıqlarına hörmət prinsipi əsas götürüldü, qadınlara seçmək hüququ verildi. Bu isə bir çox Avropa dövlətlərindən daha əvvəl həyata keçirilmiş mühüm demokratik addım idi.
Bu gün müstəqil Azərbaycan Respublikası həmin cümhuriyyətin hüquqi və siyasi varisidir. Müstəqilliyimizin qorunması, gücləndirilməsi və gələcək nəsillərə ötürülməsi hər bir vətəndaşın müqəddəs borcudur. 28 May təkcə tarix deyil, milli birlik, azadlıq və dövlətçilik ruhunun təcəssümüdür.
28 May – Müstəqillik Gününüz mübarək! Azərbaycanın bayrağı daim yüksəklərdə dalğalansın!

Hatəm İbrahimov,
Xeyriyyəçi- İş adamı