Qurban Bayramı müsəlman aləminin ən müqəddəs və ən əziz bayramlarından biri hesab olunur. Bu bayram insanlara Allah sevgisini, mərhəməti, paylaşmağı və yardımlaşmağı öyrədən mənəvi dəyərlərlə zəngindir. Hər il milyonlarla insan bu müqəddəs günləri böyük sevinc və xüsusi ehtiram hissi ilə qarşılayır. Qurban Bayramı yalnız dini ibadət deyil, həm də cəmiyyət daxilində birlik və bərabərliyi gücləndirən mühüm mənəvi hadisədir.
Bu müqəddəs bayramın əsasını Həzrəti İbrahim peyğəmbərin Allaha olan sonsuz sədaqəti təşkil edir. Onun Allah yolunda göstərdiyi itaət və fədakarlıq bu gün də insanlara örnək olaraq qalır. Qurban ibadəti insanlara səbirli olmağı, paylaşmağı və ehtiyac sahiblərinə yardım etməyi aşılayır.
Bayram günlərində insanlar qurban kəsərək onun payını kasıb ailələrə, şəhid ailələrinə və ehtiyac içində yaşayan insanlara çatdırırlar. Bu isə cəmiyyətdə mərhəmət və humanizm hisslərinin daha da güclənməsinə səbəb olur. Qurban Bayramının ən gözəl xüsusiyyətlərindən biri insanların yalnız öz sevincini deyil, başqalarının sevincini də düşünməsidir.
Bu günlərdə ailələr bir araya gəlir, yaxınlar ziyarət olunur, küsülülər barışır, insanlar bir-birinə xoş sözlər və dualar ünvanlayırlar. Bayram süfrələri ətrafında yaranan birlik hissi ailə münasibətlərini daha da möhkəmləndirir. Uşaqlar isə bayramın sevincini xüsusi həyəcan və xoşbəxtliklə yaşayırlar.
Qurban Bayramı insanlara mənəvi rahatlıq gətirən, sevgini və mərhəməti artıran müqəddəs günlərdir. Bu bayramın əsas mesajı insanlıq, birlik və paylaşmaqdır.
Müqəddəs Qurban Bayramı münasibətilə bütün xalqımızı ürəkdən təbrik edir, hər bir ailəyə can sağlığı, ruzi-bərəkət, sevinc və firavan həyat arzulayırıq. Allah bütün kəsilən qurbanları və edilən duaları qəbul etsin. Bayramınız mübarək olsun!

Rahim Novruzov
Dağlıq Şirvan Regional Təhsil İdarəsinin müdir müavini