Qurban Bayramı İslam dinində ən böyük və ən müqəddəs bayramlardan biridir. Bu bayram insanları mərhəmətə, paylaşmağa və xeyirxahlığa səsləyir. Bayramın əsas mahiyyəti insanın Allah yolunda fədakarlıq göstərməsi və ehtiyacı olan insanlara yardım etməsidir.
Qurban ibadəti insanlara paylaşmağın və yardımlaşmanın gözəlliyini öyrədir. Bayram günlərində insanlar yalnız öz ailələrini deyil, kasıb və imkansız ailələri də düşünürlər. Bu isə cəmiyyətdə humanist münasibətlərin formalaşmasına səbəb olur.
Qurban Bayramı ailə münasibətlərinin daha da möhkəmləndiyi xüsusi günlərdəndir. İnsanlar qohumlarını ziyarət edir, böyüklərin xeyir-duasını alır, uşaqları sevindirirlər. Bu günlərdə hər evdə sevinc və bayram əhval-ruhiyyəsi hiss olunur.
Bayram günlərində edilən dualar, xeyirxah əməllər və yardımlar insanların mənəvi dünyasına rahatlıq gətirir. İnsanlar bir-birinə daha çox hörmət və sevgi göstərməyə çalışırlar. Çünki Qurban Bayramı birlik və bərabərliyin rəmzidir.
Qurban Bayramı münasibətilə hər birinizə möhkəm can sağlığı, ailə səadəti və bol ruzi arzulayırıq. Allah bütün dualarınızı qəbul etsin. Bayramınız mübarək olsun!

Ramin Abasov
Dağlıq Şirvan Regional Təhsil İdarəsinin müdiri