Novruz bayramı dünyanın ən qədim və ən zəngin ənənələrə malik bayramlarından biridir. Bu bayramın tarixi minilliklər əvvələ gedib çıxır və əsasən baharın gəlişi, təbiətin oyanışı və yeni ilin başlanması ilə bağlıdır. “Novruz” sözü fars dilindən tərcümədə “yeni gün” mənasını verir və bu bayram yeni həyatın başlanğıcı kimi qəbul olunur.

Qədim dövrlərdə insanlar təbiətlə sıx bağlı yaşayırdılar. Qışın soyuq və çətin günlərindən sonra baharın gəlişi insanlar üçün böyük sevinc mənbəyi idi. Torpağın oyanması, ağacların çiçəkləməsi, günəşin daha çox istilik verməsi həyatın yenidən canlanmasını göstərirdi. Buna görə də Novruz bayramı təbiətin dirçəlişinin və yenilənmənin rəmzi sayılır.

Azərbaycan xalqı Novruz bayramını əsrlərdir böyük sevgi ilə qeyd edir. Bayramdan əvvəl dörd çərşənbə – Su, Od, Yel və Torpaq çərşənbələri keçirilir. Bu çərşənbələr təbiətin mərhələlərlə oyanmasını simvolizə edir. İnsanlar evlərini təmizləyir, həyətlərini səliqəyə salır, bayram süfrələri hazırlayır və səməni qoyurlar.

Novruz süfrəsində səməni, boyanmış yumurtalar, paxlava, şəkərbura və qoğal kimi milli şirniyyatlar xüsusi yer tutur. Bayram axşamı tonqallar qalanır və insanlar tonqalın üzərindən tullanaraq köhnə ilin bütün çətinliklərinin geridə qalmasını arzulayırlar.

Bahar bayramı münasibətilə hər birinizi səmimi qəlbdən təbrik edir, sizə möhkəm can sağlığı, ailə səadəti və bol ruzi-bərəkət arzulayırıq. Qoy Novruz bayramı hər evə sevinc və xoşbəxtlik gətirsin!

Əliyeva Səbinə
Bakı şəhəri, Xətai rayonu 24 saylı tam orta məktəbin direktoru