Novruz bayramı insanlıq tarixinin ən qədim bayramlarından biri hesab olunur. Bu bayramın kökləri min illər əvvələ gedib çıxır və əsasən təbiətin oyanışı, baharın gəlişi və yeni ilin başlanması ilə bağlıdır. “Novruz” sözü fars dilindən tərcümədə “yeni gün” mənasını verir və bu bayram yeni həyatın, yenilənmənin və ümidin rəmzi kimi qəbul olunur.

Qədim dövrlərdə insanlar təbiətlə sıx bağlı yaşayırdılar. Qışın soyuq və çətin günlərindən sonra baharın gəlişi insanlar üçün böyük sevinc mənbəyi idi. Torpağın oyanması, ağacların çiçəkləməsi, günəşin daha çox istilik verməsi həyatın yenidən canlanmasını göstərirdi. Buna görə də Novruz bayramı təbiətin dirçəlişinin və həyatın yenilənməsinin rəmzi sayılır.

Azərbaycan xalqı Novruz bayramını əsrlərdir böyük sevgi və ehtiramla qeyd edir. Bayramdan əvvəl dörd çərşənbə – Su, Od, Yel və Torpaq çərşənbələri qeyd olunur. Bu çərşənbələr təbiətin mərhələlərlə oyanmasını simvolizə edir. İnsanlar bu günlərdə evlərini təmizləyir, həyətlərini səliqəyə salır, bayram süfrələri hazırlayır və səməni qoyurlar.

Novruz süfrəsində səməni, boyanmış yumurtalar, paxlava, şəkərbura və qoğal kimi milli şirniyyatlar xüsusi yer tutur. Bayram axşamı tonqallar qalanır, insanlar tonqalın üzərindən tullanaraq köhnə ilin bütün çətinliklərinin geridə qalmasını arzulayırlar.

Bahar bayramı münasibətilə hər birinizi səmimi qəlbdən təbrik edir, həyatınıza sevinc, ailələrinizə xoşbəxtlik və süfrələrinizə bolluq arzulayırıq. Qoy Novruz bayramı hər evə ruzi-bərəkət və uğur gətirsin!


Aydın Bəşirov
Qarabağ Regional Mədəniyyət İdarəsinin müdiri