Müasir Azərbaycanın ictimai-siyasi həyatında mühüm rol oynayan şəxslərdən biri də şübhəsiz ki, Mehriban Əliyevadır. Onun fəaliyyəti yalnız dövlət idarəçiliyi ilə məhdudlaşmır; humanitar, sosial və mədəni sahələrdə gördüyü genişmiqyaslı işlər cəmiyyət tərəfindən böyük rəğbətlə qarşılanır. Mehriban xanım illərdir ki, xalqın rifahı, milli-mənəvi dəyərlərin qorunması və Azərbaycanın dünyada layiqincə təmsil olunması istiqamətində mühüm xidmətlər göstərir.
Mehriban xanımın fəaliyyəti xüsusilə xeyriyyəçilik və humanizm prinsipləri ilə seçilir. O, rəhbərlik etdiyi Heydər Əliyev Fondu vasitəsilə ölkədə və xaricdə yüzlərlə sosial layihənin həyata keçirilməsinə töhfə verib. Məktəblərin tikintisi və bərpası, səhiyyə müəssisələrinin yenilənməsi, uşaq evlərinə və aztəminatlı ailələrə dəstək kimi təşəbbüslər Mehriban xanımın fəaliyyətinin əsas istiqamətlərindəndir. Bu layihələr minlərlə insanın həyatına müsbət təsir göstərərək cəmiyyətin sosial rifahının yüksəlməsinə xidmət edir.
Mədəniyyət sahəsində də Mehriban xanımın xidmətləri xüsusi qeyd olunmalıdır. Azərbaycanın zəngin tarixinin, musiqisinin və milli dəyərlərinin beynəlxalq səviyyədə tanıdılması istiqamətində həyata keçirilən layihələr ölkəmizin mədəni nüfuzunu daha da artırıb. Onun təşəbbüsü ilə keçirilən beynəlxalq tədbirlər, festivallar və konfranslar Azərbaycanın mədəni irsini dünyaya tanıdır və ölkəmizin müsbət imicinin formalaşmasına böyük töhfə verir.
Eyni zamanda Mehriban xanım sosial məsələlərə daim həssas yanaşması ilə də seçilir. O, şəhid ailələri, qazilər və həssas sosial qruplarla mütəmadi görüşlər keçirir, onların problemlərinin həlli üçün müxtəlif proqramların həyata keçirilməsinə dəstək verir. Bu yanaşma dövlətin və xalqın birliyinin möhkəmlənməsinə xidmət edir.
Azərbaycanın dövlət idarəçiliyində də Mehriban xanımın fəaliyyəti diqqətəlayiqdir. Onun dövlət siyasətinin həyata keçirilməsində göstərdiyi fəallıq ölkənin inkişaf strategiyasının reallaşmasına mühüm töhfə verir. Bu istiqamətdə o, ölkə Prezidenti İlham Əliyevin həyata keçirdiyi siyasətin uğurla icrasına dəstək göstərərək dövlətin sosial və humanitar siyasətinin daha da gücləndirilməsinə çalışır.
Bütün bu fəaliyyətlər göstərir ki, Mehriban xanım yalnız yüksək dövlət vəzifəsi tutan siyasi xadim deyil, həm də xalqın problemlərinə həssas yanaşan, humanizm və mərhəmət prinsiplərini fəaliyyətinin əsas istiqamətinə çevirən nümunəvi bir şəxsiyyətdir. Onun gördüyü işlər bu gün Azərbaycan cəmiyyətində böyük rəğbət qazanır və gələcək nəsillər üçün örnək kimi qiymətləndirilir.
Mehriban xanımın fəaliyyəti göstərir ki, dövlətə və xalqa sevgi, məsuliyyət və humanizm prinsipləri bir araya gəldikdə böyük uğurlar əldə etmək mümkündür. Onun həyata keçirdiyi layihələr və təşəbbüslər Azərbaycan cəmiyyətinin inkişafına xidmət edən mühüm addımlar kimi tarixə yazılır.
Məlahət Abbasova
GORANBOY rayon Qızılhacılı kənd 1 saylı orta məktəbin direktoru