"Təyyarə qəzasında həlak olan şəxslərin cənazələri bu gün ailələrinə təhvil veriləcək".Bunu Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin direktoru, tibb elmləri doktoru, professor Ədalət Həsənov deyib.
O bildirib ki, nəşlər xüsusi ayrılmış avtomobillərlə birliyin üç şöbəsinə - Şərifzadə küçəsində yerləşən Patoloji Anatomiya Bürosuna, Sabunçu və Nəsimi rayon şöbələrinə aparılacaq:
"Baş Prokurorluğun İstintaq İdarəsinin qərarı əsasında həlak olanların nəşi məhkəmə-tibbi müayinədən keçiriləcək. Ekspertiza rəyi tərtib edilərək Baş Prokurorluğun İstintaq İdarəsinə təqdim ediləcək".
Ə.Həsənovun sözlərinə görə, cənazələr bu gün ailələrinə təhvil veriləcək:
"Qəzada həlak olanların nəşi müvafiq ekspertizadan sonra dəfn ediləcəkləri ünvanlara çatdırılacaq".
Xatırladaq ki, bu gün "Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsinin Aktau şəhəri yaxınlığında qəzaya uğraması nəticəsində həlak olan 3 ekipaj üzvünün (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) və 21 sərnişinin nəşlərini Bakıya gətirilib.