“Azərbaycan Milli Elmlər Akademiyasının Nizamnaməsi”ndə dəyişiklik edilib.

Oxu.Az-ın məlumatına görə, bununla bağlı Prezident İlham Əliyev fərman imzalayıb.

Fərmanla sənədin 5-ci maddəsinə 5.6-1-ci bənd əlavə edilib.

Həmin bənddə yazılır ki, Akademiyanın Rəyasət Heyətinin fəxri doktor seçmək hüququ var.

Nizamnamənin 7.9.13 bəndinə əsasən, Akademiyanın ümumi yığıncağı Akademiyanın prezidentini, vitse-prezidentlərini, akademik-katibini, Rəyasət Heyətinin digər üzvlərini ümumi yığıncaqda iştirak edən üzvlərinin üçdə iki səs çoxluğu ilə seçir və elmi bölmələrin akademik-katiblərini Rəyasət Heyətinin üzvləri kimi təsdiq edir.

Prezidentin müvafiq fərmanı ilə edilən dəyişiklikdə isə göstərilir ki, Akademiyanın ümumi yığıncağı qurumun birinci vitse-prezidentlərini səs çoxluğu ilə seçir.

Yeni fərmanla müvafiq bənddə göstərilən “elmi bölmələrin akademik-katiblərini” sözləri çıxarılıb.

Həmçinin, 8-ci bənddə də dəyişiklik edilib. Belə ki, sənədin əvvəlki variantında yazılırdı ki, Akademiyanın Rəyasət Heyəti Akademiyanın prezidentindən, vitse-prezidentlərindən, akademik-katibindən, elmi bölmələrin akademik-katiblərindən, regional elmi bölmələrin sədrlərindən və Akademiyanın digər həqiqi üzvlərindən ibarətdir.

Yeni fərmanla Akademiyanın birinci vitse-prezidentləri də Rəyasət Heyətinin tərkibinə daxil edilir.

Həmin cümlədən “elmi bölmələrin akademik-katiblərindən,” və “Akademiyanın digər həqiqi üzvlərindən” sözləri çıxarılıb.

Bildirilir ki, Akademiyanın digər həqiqi üzvləri də Rəyasət Heyətinin üzvü seçilə bilərlər.

Fərmanla sənədin 8.14-cü bəndi ləğv edilib. Həmin bənddə yazılırdı ki, Akademiyanın vitse-prezidentləri, akademik-katibi və Rəyasət Heyətinin digər üzvləri Akademiya prezidentinin təqdimatı ilə Akademiyanın Rəyasət Heyəti tərəfindən təsdiq edilir.

Ölkə başçısının fərmanı ilə 8.17-ci bəndə edilən dəyişiklikdə bildirilir ki, Akademiyanın akademik-katibi vəzifəsinə görə Akademiyanın vitse-prezidentinə bərabər tutulur. Öz fəaliyyətini rəhbərlik etdiyi elmi katiblər vasitəsilə həyata keçirir, Rəyasət Heyəti aparatının tərkibindəki şöbələrin işini əlaqələndirir.

Bununla yanaşı Nizamnaməyə 11.9.1-ci bənd əlavə olunub.

Həmin bəndə görə, Akademiyanın Naxçıvan bölməsinin sədri vəzifəsinə görə Akademiyanın vitse-prezidentinə bərabər tutulur. Akademiyanın ümumi yığıncağında seçilmiş Naxçıvan bölməsinin sədrini Naxçıvan Muxtar Respublikası Ali Məclisinin sədri həmin vəzifəyə təsdiq edir.