Koronavirusun yayıldığı ölkələrin heç birində dövlət başçıları regionlara səfər etmir, insanlarla görüşmür.

Prezident İlham Əliyev isə martın 3-də bir sıra rayonlara səfərləri göstərdi ki, ölkənin regionlarında vəziyyət, insanların problemlərinin həlli dövlət üçün prioritet təşkil edən məsələdir.

Səfərlər çərçivəsində Azərbaycan Prezidenti İlham Əliyev Goranboy Rayon Mərkəzi Xəstəxanasının açılışında iştirak etdi.

İlham Əliyevin xəstəxananın kollektivi ilə görüşdə çıxışı səhiyyə sahəsində qarşıda duran çağırışların Azərbaycan ictimaiyyətinə ünvanlanan bəyanı idi.

İrandan gələnlər anlayış göstərməlidir

Prezidentin çıxışı göstərdi ki, Azərbaycanda səhiyyə sisteminin maddi-texniki bazasının möhkəmləndirilməsi gözlənilməz, fors-major hadisələri də nəzərə alır.

Dövlət başçısı Azərbaycanda koronavirus infeksiyası ilə bağlı vəziyyətin ciddi nəzarət altında olduğunu da bəyan etdi.

“Hazırda dünya gündəliyini zəbt edən koronavirus məsələsidir və demək olar ki, bütün ölkələrdə bu məsələ müzakirə olunur. Azərbaycana gəldikdə, deyə bilərəm ki, vəziyyət nəzarət altındadır və mənim göstərişimlə Nazirlər Kabinetinin yanında xüsusi operativ qərargah yaradılıb. Eyni zamanda, göstəriş vermişəm, əlavə 10 milyon manat vəsait ayrılsın ki, lazımi tədbirlərin görülməsi daha sürətlə aparılsın. İranda qalan Azərbaycan vətəndaşlarının təxliyyə edilməsi üçün xüsusi tədbirlər həyata keçirilir. Onların həm quru sərhəddən, həm də hava nəqliyyatı vasitəsilə Azərbaycana gətirilməsi təmin ediləcək”, - deyə Prezident bildirib.

İrandan gələn vətəndaşların lazım olan müddətdə karantində qalması zəruridir və bu, hamı tərəfindən anlayışla qarşılanmalıdır.

Prezident bu məqsədlə söyləyib ki, həmin şəxslər lazım olan müddət ərzində karantində qalmalıdırlar ki, Azərbaycanda xəstəlik yayılmasın.

Uşaqların, yeniyetmələrin koronavirusdan qorunması

Baş nazir Əli Əsədovun sərəncamı ilə Azərbaycan ərazisində fəaliyyət göstərən bütün təhsil müəssisələrində tədris və təlim-tərbiyə prosesi martın 3-dən 9-dək dayandırılıb.

İlham Əliyev bu barədə də danışıb, deyib ki, koronavirus infeksiyasının yayılmasının qarşısının alınması və uşaqları, yeniyetmələri qorumaq üçün tədris, təlim-tərbiyə müəssisələri müvəqqəti bağlanılıb.

Xəstəliyin yayılmasının qarşısının alınması üçün Azərbaycan hökumətinin gördüyü tədbirlər müvafiq beynəlxalq təşkilatla koordinasiyalı şəkildə həyata keçirilir.

İlham Əliyev qeyd edib ki, Azərbaycan hökuməti Ümumdünya Səhiyyə Təşkilatı ilə sıx təmasdadır, xəstəliyi aşkar etmək üçün testlərin ölkəyə gətirilməsi ilə bağlı müvafiq işlər aparılır.

Tranzit yükdaşımalarında sürücülərə jest

Dünya ölkələri bu günə qədər koronavirusla bağlı yükdaşımaların həyata keçirilməsinə məhdudiyyət qoymayıb. Azərbaycan da eyni mövqeni nümayiş etdirib.

Prezident, bununla belə, vəziyyətin nəzarət altında olduğunu söyləyib. O, tranzit yükdaşımalarını həyata keçirən sürücülərə yemək təqdim edilməsi ilə bağlı göstəriş verdiyini bildirib.

“Göstəriş vermişəm, xarici sürücülərə yemək təqdim edilsin ki, onlar idarə etdikləri maşınlardan tez-tez çıxıb ictimai yerlərə getməsinlər. Yəni hər bir xırdalığa qədər düşünülmüş addımlar atılır, bunun da məqsədi Azərbaycan vətəndaşlarını bu xəstəlikdən qorumaqdır. Bu günə qədər bizim bütün addımlarımız uğurla nəticələnib”.

Möhtəkirlər cəzalandırılacaq

Prezident çıxışında yaranmış vəziyyətdən istifadə edib möhtəkirliklə pul qazananlar, apteklərdə süni şəkildə maska qıtlığı yaradanlar barəsində də ciddi cəza tədbirləri görüləcəyini bildirib.

“Mənə verilən məlumata görə, son vaxtlar apteklərdə maskaların çatışmazlığı müşahidə olunur. Buna heç cür izahat tapmaq mümkün deyil. Çünki bizim kifayət qədər maska ehtiyatlarımız var”, - deyən Prezident əlavə edib ki, hansısa möhtəkirlər bu vəziyyətdən istifadə edərək, öz qanunsuz gəlirlərini artırmaq istəyirlər.

Dövlət başçısının sözlərinə görə, bütün hüquq-mühafizə orqanlarına tapşırıq verilib ki, bu hallara yol verən vətəndaşlara qarşı ən ciddi cəza tədbirləri tətbiq edilsin.

“Çünki indiki şəraitdən istifadə edərək, öz tamahını təmin etmək üçün bəd əməllərə üz tutan ünsürlərə qarşı ancaq çox ciddi cəza tədbirləri tətbiq edilməlidir”, - deyən Prezident Azərbaycan ictimaiyyətini əmin edib ki, hökumət bütün lazımi tədbirləri görür.

Ölkə başçısı Azərbaycanda koronavirusla bağlı mənzərəninin narahatlıq üçün ciddi əsas yaratmadığını da söyləyib.

“Karantində qalan vətəndaşların mütləq əksəriyyətində hələlik heç bir xəstəlik əlaməti aşkarlanmayıb. Əgər onların sağlamlığı normal olarsa, lazımi müddətdən sonra evlərinə buraxılacaqlar. Hesab edirəm ki, bu günə qədər bu məlumat kifayətdir”.


Aqşin Kərimov

Oxu.az