26 İyun – Silahlı Qüvvələr Günü Azərbaycan xalqının qəhrəman ordusuna olan sonsuz hörmət və ehtiramının ifadə olunduğu ən əlamətdar günlərdən biridir. Bu tarix təkcə peşə bayramı deyil, həm də dövlətimizin gücünün, xalqımızın birliyinin və Vətənə sonsuz sədaqətin rəmzidir.
Azərbaycan Ordusu uzun illər ərzində böyük inkişaf yolu keçərək regionun ən güclü və peşəkar ordularından birinə çevrilmişdir. Müasir hərbi texnika, yüksək döyüş hazırlığı, peşəkar zabit heyəti və Vətən sevgisi ilə silahlanmış hərbçilərimiz ölkəmizin təhlükəsizliyinin etibarlı təminatçısıdır.
Ordumuzun şanlı tarixində ən möhtəşəm səhifələrdən biri 2020-ci ilin 44 günlük Vətən müharibəsidir. Azərbaycan əsgəri misilsiz qəhrəmanlıq göstərərək illərlə işğal altında qalan torpaqlarımızı azad etdi, xalqımıza Qələbə sevincini yaşatdı və bütün dünyaya Azərbaycan xalqının sarsılmaz iradəsini nümayiş etdirdi. Bu şanlı Zəfər tariximizə qızıl hərflərlə yazıldı. Sonrakı dövrdə ölkəmizin bütün ərazisində dövlət suverenliyinin tam bərpa olunması isə Azərbaycan Ordusunun qüdrətinin növbəti təntənəsi oldu.
Bu gün hər bir Azərbaycan əsgəri Vətənə sədaqətin, igidliyin və fədakarlığın canlı nümunəsidir. Biz şəhidlərimizin müqəddəs xatirəsini sonsuz ehtiramla yad edir, qazilərimizin göstərdiyi şücaəti yüksək qiymətləndiririk. Onların qəhrəmanlığı gələcək nəsillər üçün əbədi örnəkdir.
26 İyun – Silahlı Qüvvələr Günü münasibətilə bütün hərbi qulluqçularımızı, ehtiyatda olan zabitlərimizi, qazilərimizi, veteranlarımızı və şəhid ailələrini ürəkdən təbrik edir, onlara möhkəm cansağlığı, ailə səadəti və şərəfli xidmətlərində yeni uğurlar arzulayırıq.
Qoy üçrəngli bayrağımız daim yüksəklərdə dalğalansın, Azərbaycan Ordusu isə hər zaman yenilməz və qalib olsun!
Yaşasın Azərbaycan! Yaşasın Müzəffər Azərbaycan Ordusu!
Səfər Əlirzayev
Azərbaycan Təmiz Texnologiyalar Şirkətinin təsisçisi, İş adamı