Azərbaycan xalqının tarixində elə mühüm günlər vardır ki, həmin tarixlər dövlətimizin taleyini müəyyənləşdirərək gələcək inkişafına güclü təkan vermişdir. 15 İyun – Milli Qurtuluş Günü məhz belə əlamətdar tarixlərdən biridir. Bu gün xalqımızın milli iradəsinin, dövlətçilik ənənələrinin və müstəqillik əzminin təntənəsi kimi böyük ehtiramla qeyd olunur.
1993-cü ilin yayında Azərbaycan ciddi siyasi böhran, iqtisadi çətinliklər və daxili qarşıdurmalarla üzləşmişdi. Müstəqilliyini yenicə bərpa etmiş ölkəmiz parçalanmaq və vətəndaş müharibəsi təhlükəsi ilə qarşı-qarşıya idi. Belə bir taleyüklü məqamda xalqın tələbi ilə ümummilli lider Heydər Əliyevin yenidən siyasi rəhbərliyə qayıdışı ölkədə sabitliyin bərpasına, dövlət idarəçiliyinin möhkəmləndirilməsinə və milli maraqların qorunmasına yol açdı.
15 İyun tarixindən sonra Azərbaycanda hüquqi dövlət quruculuğu istiqamətində mühüm islahatlar həyata keçirildi, iqtisadi inkişafın əsası qoyuldu, ordu quruculuğu gücləndirildi və ölkəmizin beynəlxalq əlaqələri daha da genişləndirildi. Azərbaycanın dünya miqyasında etibarlı tərəfdaş kimi tanınması, regional və qlobal layihələrdə fəal iştirakı məhz həmin dövrdə formalaşdırılan uzaqgörən siyasətin nəticəsi idi.
Milli Qurtuluş Günü yalnız keçmişdə baş vermiş tarixi hadisənin xatirəsi deyil, həm də dövlətçiliyin qorunmasının, xalq-hakimiyyət birliyinin və milli həmrəyliyin əhəmiyyətini gələcək nəsillərə çatdıran mühüm bir gündür. Bu tarix bizə göstərir ki, güclü dövlət yalnız birlik, vətən sevgisi və xalqın iradəsi ilə qurula bilər.
Bu gün müasir Azərbaycan öz dinamik inkişafı, güclü iqtisadiyyatı, müstəqil siyasəti və beynəlxalq nüfuzu ilə seçilir. Bütün bunlar Milli Qurtuluş Gününün xalqımız üçün nə qədər böyük əhəmiyyət daşıdığını bir daha təsdiq edir.
15 İyun – Milli Qurtuluş Günü münasibətilə bütün Azərbaycan xalqını ürəkdən təbrik edir, dövlətimizə daim qüdrət, xalqımıza birlik, əmin-amanlıq, firavanlıq və yeni-yeni uğurlar arzulayırıq. Qoy müstəqil Azərbaycan hər zaman inkişaf etsin və zəfərlər qazansın! Bayramınız mübarək!


Səxavət Məmmədov,
İş adamı