Dekabrın 27-də Ağdaş rayonunun ümumi təhsil müəssisələrində cari tədris ilində yeni fəaliyyətə başlamış bir qrup gənc müəllimlə görüş keçirilib. Görüşdə Tədrisin keyfiyyəti sektorunun müdiri Leyla Bayramova, Ağdaş rayonu üzrə təhsil sektorunun müdiri Rahim Məmmədov, dövlət qulluqçuları, gənc müəllimlər, qabaqcıl iş təcrübəsi olan və mentor təyin olunmuş təhsil işçiləri iştirak edib. Ağdaş rayonu üzrə təhsil sektorunun müdiri Rahim Məmmədov ilk olaraq işə yeni təyin olunmuş müəllimləri təbrik edərək onlara gələcək fəaliyyətlərində uğurlar arzu edib. Sektor müdiri tərəfindən müəllimlərə Ağdaş rayonu üzrə cari ildə fənlər üzrə təqdim olunan vakant yerlər barədə məlumat verilib. Daha sonra cari ildə görülmüş işlər və əldə olunmuş naliyyətlər barədə fikir bildirilib. Daha sonra Tədrisin keyfiyyəti sektorunun müdiri Leyla Bayramova yeni təyin olunmuş gənc müəllimlərin peşəkarlıq səviyyəsinin artırılması, metodik xidmətin düzgün qurulması və təkmilləşdirilməsi, pedaqoji təcrübənin öyrənilməsi və inkişaf etdirilməsi istiqamətində görülməli olan zəruri işləri diqqətə çatdırıb. Görüşdə həmçinin gənc müəllimlərə təyin olunmuş mentor müəllimlərə təlim keçirilib və daha sonra onlarla fikir mübadiləsi aparılıb. Çıxış edən gənc müəllimlər göstərilən diqqətə görə öz təşəkkürlərini bildiriblər və dövlətin onlara göstərdiyi etimadı daim doğruldacaqlarını qeyd ediblər.
#MÜTDA #MərkəziAranRTİ #ÜmumiTəhsil #GəncMüəllim #Görüş