“Azərbaycanın “Laçın” sərhəd-buraxılış məntəqəsində saxlanılan erməni futbolçulara qarşı cinayət təqibinə xitam verməsi ölkənin Ermənistanla sülh sazişi imzalamaq və Qarabağ bölgəsinin erməni əhalisini reinteqrasiya etmək niyyətindən xəbər verir”.

“Report” xəbər verir ki, bunu beynəlxalq münasibətlər üzrə pakistanlı analitik Xalid Taymur Əkrəm deyib.

O qeyd edib ki, Azərbaycan təqsirləndirilən şəxslərin yaşını və onların səmimi peşmanlığını nəzərə alıb və humanizm nümayiş etdirib ki, bu da beynəlxalq ictimaiyyət tərəfindən yüksək qiymətləndirilməlidir:

“Belə bir addım Ermənistan üçün nümunə olmalıdır. Bu, müsbət gələcəyə münasibəti göstərən əsl humanist addımdır. Azərbaycanın bu cür addımları ölkələr arasında sülhə yol açır”.

Xatırladaq ki, Azərbaycanın Dövlət Bayrağına qarşı təhqiramiz hərəkətlər törətməklə bağlı erməni futbolçular “Laçın” sərhəd-buraxılış məntəqəsində saxlanılıblar. Lakin Azərbaycan sonradan humanizm prinsiplərindən çıxış edərək bu cinayət təqibini dayandırıb.

Belə ki, onlar inzibati qaydada 10 sutkalıq həbs ediliblər. Məhkəmə qərarı icra olunduqdan sonra həmin şəxslərin Azərbaycandan deportasiyası təmin ediləcək.