Vladivostokda baş verən dəhşətli yanğın hadisəsi nəticəsində doqquz, altı və üç yaşlarında olan üç uşaq həyatını itirib. Hadisə Tolstov küçəsindəki 30 nömrəli binanın yeddinci mərtəbəsində yerləşən mənzildə qeydə alınıb.
Xilasedicilər hadisə yerinə yaxınlaşarkən həyətdə quraşdırılmış plastik məhdudlaşdırıcılar səbəbindən ciddi çətinliklərlə üzləşiblər.
Primorsk diyarı Fövqəladə Hallar Nazirliyinin mətbuat xidmətindən verilən məlumata görə, yanğın barədə çağırış 12 fevral saat 22:03-də daxil olub. Hadisə yerinə gələn xilasedicilər binanın girişində güclü tüstülənmə aşkar ediblər. Qonşu mənzillərdən ikisi uşaq olmaqla cəmi altı nəfəri təxliyə etmək mümkün olsa da, yanan mənzildə olan üç uşağı xilas etmək mümkün olmayıb; onlar hadisə zamanı evdə böyüklərin nəzarəti olmadan tək qalıblar.
Qonşuların bildirdiyinə görə, yanğının baş verdiyi otaqda müşahidə kameraları quraşdırılıbmış. Kamera qeydlərindən məlum olub ki, uşaqlardan biri valideynlərinin çarpayısının yanında alışqanla oynayıb və bu, yanğının başlamasına səbəb ola bilərdi.
Yanğın yalnız üç saatlıq mübarizədən sonra tamamilə söndürülüb. Əməliyyata 29 nəfərlik şəxsi heyət və səkkiz ədəd texnika cəlb olunub. Hazırda hadisə yerində Fövqəladə Hallar Nazirliyinin psixoloqları və təhqiqatçılar faciənin dəqiq səbəblərini araşdırırlar. Baş vermiş hadisə ictimaiyyəti dərindən sarsıdıb və bir çoxları həlak olan uşaqların ailəsinə başsağlığı verir.