Azərbaycan xalqının dövlətçilik tarixində mühüm əhəmiyyətə malik olan günlərdən biri də 12 noyabr – Konstitusiya Günüdür. Bu tarix, müstəqil Azərbaycanın dövlət quruculuğu prosesində xüsusi mərhələ kimi yadda qalıb. Çünki 12 noyabr 1995-ci ildə ümumxalq səsverməsi (referendum) yolu ilə müstəqil Azərbaycan Respublikasının ilk Konstitusiyası qəbul olunmuşdur.

Konstitusiya – hər bir dövlətin hüquqi və siyasi əsaslarını müəyyən edən ali qanundur. O, dövlətin idarəetmə formasını, hakimiyyətin bölünməsi prinsipini, vətəndaşların hüquq və azadlıqlarını, eləcə də dövlət orqanlarının fəaliyyət qaydalarını müəyyən edir. Azərbaycan Respublikasının Konstitusiyası da xalqın suveren iradəsini, dövlətin müstəqilliyini və demokratik inkişaf istiqamətini özündə əks etdirir.

1995-ci ilin 12 noyabrında keçirilmiş referendumda xalqımız öz səsini hüquqi dövlətin və vətəndaş cəmiyyətinin qurulması naminə vermişdi. Bu sənədin qəbulu ilə Azərbaycan dövlətçiliyi möhkəmlənmiş, müstəqilliyimizin hüquqi əsasları təsbit olunmuşdur. Konstitusiya qəbul ediləndən sonra ölkədə yeni qanunvericilik bazasının formalaşdırılmasına başlanılmış, insan hüquq və azadlıqlarının təmin olunması, demokratik prinsiplərin inkişafı istiqamətində mühüm addımlar atılmışdır.

Azərbaycan Konstitusiyası 5 bölmə, 12 fəsil və 158 maddədən ibarətdir. Onun əsas mahiyyəti – “xalq hakimiyyətinin mənbəyi Azərbaycan xalqıdır” prinsipi üzərində qurulmuşdur. Burada dövlətin əsas məqsədi kimi insan və vətəndaş hüquqlarının qorunması, ədalət və bərabərliyin təmin olunması, sosial ədalətə əsaslanan cəmiyyətin yaradılması müəyyən edilmişdir.

Ümummilli lider Heydər Əliyevin rəhbərliyi ilə hazırlanan bu mühüm sənəd Azərbaycanın siyasi və hüquqi tarixində dönüş nöqtəsi olmuşdur. Məhz onun uzaqgörən siyasəti nəticəsində dövlət idarəçiliyində hüququn aliliyi prinsipi bərqərar olmuş, ölkəmiz beynəlxalq hüquqi sistemə uyğun müstəqil dövlət kimi formalaşmışdır.

Hər il 12 noyabr tarixində Azərbaycan xalqı Konstitusiya Gününü böyük qürur və fəxrlə qeyd edir. Bu gün təkcə bir hüquqi sənədin qəbulu deyil, həm də azad, demokratik və müstəqil dövlətimizin təməl daşının qoyulduğu gün kimi dəyərləndirilir.

Bu münasibətlə hər bir vətəndaş Konstitusiyanın qorunmasına, onun prinsiplərinə əməl olunmasına borclu olduğunu dərk etməlidir. Çünki Konstitusiya – xalqın iradəsini, azadlığını və gələcəyini təmin edən müqəddəs sənəddir.

Əkrəm Babayev,
Qəbələ-Oğuz Regional Meşə Təsərrüfatı Mərkəzinin direktoru,
1-ci və 2- ci Vətən Müharibəsinin iştirakçısı, Müharibə Veteranı